كتاب !

مش عارفة ليه طول عمري براوية و نافرة .. و مش باطيق حد يجيبلي هدية.. و لا اني استقبل هدية.. كنت باعمل تعبانة و فطسانة .. و اي حاجة ف يوم ميلادي.. و اي مناسبة هاكون فيها هاستقبل هدية ... الهدية بجد عبء مشاعر و ناس من لحم و دم .. ايون عبء.. مش قولنا عيلة براوية و نافرة...

بس مع الكتب .. الأمر يختلف كالاختلاف نفسه .. أنا عمري ما فرحت بهدية أد هدية أبي ليا أول ما تميت ال16 سنة... J

كانت شوكولاتاية بالبندق.. و شمعة عليها رقم 16 .. شمعة بس من غير تورتة.. و الحمد لله كانت اخر مرة يقولي فيها " كل سنة و انتي طيبة يا هنود" ... J كتر خيره بصراحة .. 16 سنة بنته و ف وشه .. الرااجل مستحمل كتير برضه !

و الكتاب بئا بئا ... دا الحاجة الوحيدة اللي بافرح بيها زي فرحة العيال الصغيرة فرحتهم بهدوم العيد و الشوز يوم الوقفة .. و انام و الكتب ف حضني .. J

الكتب.. الكتب اللي جاتلي هدية بمناسبة.. و الاروع منها اللي جاتلي من غير مناسبة... لما حد يفتكرني ادام كتاب و يجيبهولي.. لما أتفاجأ "هنوود.. جبتلك دا! " و دا يكون كتااب.. كتاب.. ك..ت...ا...ب يا بشرية ..

حبة صفحات..شوية ورق بكلامهم ؟ يمكن.. بس "ح..ا...ل..ة"

كتاب.. ورق و حبة كلام.. بس وراهم تعب..فرح.. يأس...هم.. كآبة.. وراهم باختصار "انسان" بكل اللي فيه.. وراهم حبة توهان في الملكوت الوااسع دا.. أه وراهم فكرة.. ثقافة.. معلومة.. ماشي.. انما الكتب عندي كما المخدرات.. صنف للتعاطي.. و التوهان لا يختلف عن الحشيش كثيرا.. او قليلا حتي J

لحظة.. !

أنا ايه اللي وداني بالكلام ل هنا... و فلسفتي الصغيرة ف القراءة و الكتب.. ؟؟

طوويب أنا مسطولة و سكرانة بالكتاب الهدية دا !! معايا عذري.. انما انتوا سرحتوا معايا كدا ع طووول!! محدش أخد بيدي و رجعني للي كنت باقوله..؟؟ عجيب أمركم !!

نهايته..

أول مرة كانت .. "ماي لافلي اتش.. ديدي"

"ثلاثة اشباح متحركة ف البلاطي البيضاء... مستهلكات تمااامااا...

في اتجاه الLocker عشان نخفي ادوات الجريم.. عفوا.. قصدي ادوات الكيميا... خارجات من معمل العضوية.. (عقاب السماء العضوية دي) تفوح منا رائحة ال..احم العلم الكيماوي طبعا !!

افتح الLocker بتاعي انا و مرة واحدة يحط علي عفرتة و جنان عيل ف 2 ابتدائي... و "الله عليكي يا ديدي... هو داا الكلاااام ... هكذا يكوون الصووحااب ياا جدعاان... وههوو... و أخيرا زست" دا كان مني اكيد و طبعا صاحبتاي الاثيرتان أصبحتا شبه علامتي

الاستفهام و التعجب معا J

_ " زست ايه يا وزة؟؟ انتي اتهطلتي رسمي... انتي شميتي ايه ف معمل العضوية يا بت؟؟"
 _ " عضوية؟؟!! انتوا ميين؟؟ عضوية ايه و شميت ايه؟؟ بقولكوا اخييييييراا زست.. طول عمري عارفة ديدي دي مزززتي الابدية... "

و ببساطة أزاحوني جانبا و بصوا ع الlocker و لقووه... "موسم الهجرة الي الشمال" ...

_" اههاااا... طووول عمرك هتفضلي هطلة و مفتاحك ف كتاب...و ربنا المعبود يا وزة لتيجي ارض ارض و ع بوزك و بالمستعجل كمان بسبب كتاب... دا لما يحب يبلفك .. هيجبلك كتاب يا عبيطة..."
_" و ماله ... يجيب.. دا عز الطلب.. :P"

******

و دا كان الكتاب الاول....
اما الكتاب التاااني ف برغم اني قرأته قبلها يجي تلاتيين مرة بس و لا مر ة مسكته بين ايديا... قرأته pdf ... و عن تجربة.. تبا كبيييييييرة للpdf ... دا حاجة كدا شبه المياه المالحة ... ماترويش... تعطش زيادة للكتاب بئا.. للورق و الصفحات و كدا J

اصلا كان يووم جااامد أكثر مما أقدر اوصف او اتخيل ... بافتح الباب و الاقيييهم كووووولهم ف وشي بيصرخوا زي اللي عليهم عفاريت SURPRIIIIIIISSSE" .... كاااان يوووم اسووود يوووم ماااجيتي..."
بيحتفلوا بعيد ميلادي طبعا J

و تورتة تووحفة... أحلي تورتة جاتلي ف عمري كله... و snow لما اتعمينا ... و بلاليييييييييييين ... الله بااحبها جداااJ
و شمعة بالH و التانية بالN لأحلي مولودة ف مارس (من بعدي طبعا) ! "نونو"
"و خلااااص يللا بئا نقوم نمشي .. الوقت بئا المغرب... "
" ايه دا .. خلاص مااشيين؟؟ L"
" ااه خلاوويص بئا .. عشان هنرووح بعييد... كوووول سنة وا نتي طيبة ياا وزة... و معاااانا.. بس برضه يااا رب نخلص منك ع السنة الجاااية بئا يااا رب J" ... اسكت انا و انا زعلانة انهم ماشيين .. للحظة افتكرتهم هيباتوا معايا و مش هيسبوني وحدي تاني... او ع الاقل ياخدوني معاهم و هم مروحين.. !
" ااااه كنت هانسي يا هنوود... كوووووول سنة و انتي طيبة يا هنودتي ... دي عشاانك.. عارفة انك بتحبيها.."
و الاقي نهي حدفتني باحلي من المتوقع..." الخيميائي" !

****

و دا الكتاب التاني .. أما التالت بئا .. بئا بئا ف دا حدوووتة لحااله ..كانت أول مرة أسمع عنه.. منه هو .. و أما قولتله أول مرة أسمع بيه.. قالي استني.. و راح منقي كام حاجة منه كدا.. و قرأها لي... عوااالم بنفسجية بتموجات اللون الرائع دا يتداخل معها درجات الازرق كلها...و انا باسمعه بيقرألي.. حلو الشعور دا .. حلو بشكل شنيع... و في راسي فيروز.. دوما فيروز ..بتشدو.. " رديتلي كتبي و مدرستي و العمر اللي كان... و انسااااني الزمان ع سطح الجيران" .... وقتها حسيت اني رجعت عيلة بضفيرة.. و هو الكبير اللي يعرف كل حاجة و بيقرالي الحواديت ..!
 " ازيك.. "
" تماام الحمدلله.. مبسوط اني شوفتك.. " يقوم وشي يفضحني اكتر ... و ياخد كل درجات الاحمر المتاحة.. و اسكت !
" طيب خلاص... إيه كل الأحمر دا... ع فكرة جبتلك هدية .. يا رب تعجبك.. " و يفتح الشنطة يطلعلي الكتاب اللي أدمنته بعد ما قرألي منه..." أرز باللبن لشخصين" ...
يزيد الأحمر ف وشي.. و أسخن زياادة من كتر فرحتي.. و لساني يتقل و ماعرفش انطق....
" بجد؟؟... دا عشااني... J "
" أيوون .. دا هدية ... و مش هيرجع ابدا "
" أنت ر..ا...ئ...ع.. " و السيطرة للأحمر لازالت
" طيب خلااص .. تعالي هاعزمك علي بطاطس.."
و أمشي أنا كأنني هاتنطط.. كتاب و هايأكلني بطاطس كمان ... اييه الكااائن الخراافي دا ...

J  أنا بس حبيت أقول لكل واحد فيهم "شكرا لأنكم عندي هنا ف دنيتي.. و ربنا يصبركم علي"